உத்தரகாண்ட் சுரங்க விபத்தில் மீட்கப்பட்ட 41 சுரங்க தொழிலாளர்கள் ரிஷிகேஷில் உள்ள மருத்துவமனைக்கு ஹெலிகாப்டர் மூலம் கொண்டு செல்லப்பட்டனர். அங்கு அவருக்கு பல்வேறு பரிசோதனைகள் மற்றும் தேவையான சிகிச்சை அளிக்கப்படவுள்ளது.

உத்தரகாண்ட் மாநிலம் உத்தரகாசி அருகே சில்க்யாரா சுரங்கத்தில் சிக்கியிருந்த 41 தொழிலாளர்கள் 17 நாட்கள் தொடர் மீட்புப் பணிக்கு பிறகு நேற்று இரவு பத்திரமாக மீட்கப்பட்டனர்.

இந்நிலையில் மீட்கப்பட்ட அனைவரும் அருகில் உள்ள சின்யாலிசார் சமூக நல மையத்தில் அனுமதிக்கப்பட்டனர். அங்கு அவருக்கு மருத்துவ பரிசோதனை செய்யப்பட்டது. மேலும் அனைவரும் நலமாக இருப்பது உறுதி செய்யப்பட்டது.

இன்று காலை மருத்துவ மனைக்கு வருகை தந்த மாநில முதல்வர் புஷ்கர் சிங் தாமி, மீட்கப்பட்ட தொழிலாளர்களை சந்தித்து நலம் விசாரித்தார். பின்னர், செய்தியாளர்களிடம் பேசிய அவர் 41 தொழிலாளர்களின் உடல் நலமும் பரிசோதிக்கப்பட்டு அனைவரும் நலமுடன் இருக்கிறார்கள்.

மேலும் மருத்துவர்களின் ஆலோசனையின் பேரில் அவர்கள் ரிஷிகேஷில் உள்ள எய்ம்ஸ் மருத்துவமனைக்கு அழைத்துச் செல்லப்பட்டு அங்கு அவர்களுக்கு பல்வேறு மருத்துவ பரிசோதனைகள் மேற்கொள்ளப்படும் என தெரிவித்தார்.

இதையடுத்து, சின்யாலிசாரில் இருந்து 41 தொழிலாளர்கள் இந்திய விமானப்படையின் சினூக் ரக ஹெலிகாப்டர் மூலம் ரிஷிகேஷுக்கு அனுப்பி வைக்கப்பட்டனர். அங்குள்ள எய்ம்ஸ் மருத்துவமனையில் அவருக்கு மேம்பட்ட பரிசோதனைகள் மேற்கொள்ளப்பட்டு வருகின்றன.

இதுகுறித்து செய்தியாளர்களிடம் பேசிய மருத்துவமனையின் நிர்வாகி டாக்டர் நரேந்திர குமார், “41 சுரங்க தொழிலாளர்களும் எய்ம்ஸ் மருத்துவமனைக்கு வந்துள்ளனர். அவர்களுக்கு எந்தவிதமான காயங்களும் உடலில் இல்லை. மேலும் அவர்கள் மன அழுத்தத்தில் இருப்பதாகத் தெரியவில்லை. இருப்பினும், மனநல மருத்துவர்கள் மற்றும் பொது மருத்துவர்களின் குழு அவர்களை பரிசோதித்து வருகின்றனர்”.

ரத்தப் பரிசோதனை, இதயப் பரிசோதனை செய்யப்படும். அதன் பிறகு, அவர்களுக்கு மருத்துவ சிகிச்சை தேவையா அல்லது டிஸ்சார்ஜ் செய்யப்பட வேண்டுமா என்பதை மருத்துவர் முடிவு செய்வார்.

அவர்கள் எப்போது டிஸ்சார்ஜ் செய்யப்படுவார் என்பது உடனடியாக கூற முடியாது. மேலும்பரிசோதனைகளின் முடிவுகள் அடிப்படையில் முடிவு எடுக்கப்படும். என்ன இருந்தாலும் 24 மணி நேரமும் இங்கேயே இருப்பார்கள்.