ஜப்பானிய தொழிலாளர் சந்தையில் இலங்கைப் பணியாளர்களுக்கு அதிக வேலை வாய்ப்புகளைப் பெற்றுக் கொடுப்பதற்காக ஜப்பானில் உள்ள பிரதான வேலைவாய்ப்பு நிறுவனங்களுடன் தமது அமைச்சு நெருக்கமாகச் செயற்பட்டு வருவதாக தொழிலாளர் மற்றும் வெளிநாட்டு வேலைவாய்ப்பு அமைச்சர் மனுஷ நாணயக்கார தெரிவித்தார்.
ஜப்பானுக்கு உத்தியோகபூர்வ விஜயம் மேற்கொண்டுள்ள அமைச்சர், PERSOL Global Workforce இன் பிரதம நிறைவேற்று அதிகாரி திரு மொரிஹிரோ தடாவை சந்தித்து இலங்கை தொழிலாளர்களுக்கு அதிக வேலை வாய்ப்புகளை வழங்குவது தொடர்பில் கலந்துரையாடினார்.
திரு. மோரிஹிரோ தடா ஜப்பானில் வேலை செய்வதற்கு மொழிப் பயிற்சி பெறுவதன் முக்கியத்துவத்தை சுட்டிக்காட்டினார்.
ஜப்பானிய மொழியை கற்பிக்க எடுக்கப்பட்டுள்ள நடவடிக்கைகள் குறித்து விளக்கமளித்த அமைச்சர், ஜப்பானிய மொழியை பாடசாலை பாடத்திட்டத்தில் ஒரு பாடமாக இணைப்பதற்கான அமைச்சரவை பத்திரம் சமர்ப்பிக்கப்பட்டுள்ளதாக தெரிவித்தார்.
வருங்கால ஊழியர் ஒருவருக்கு வேலை கிடைக்கும் போது, ஜப்பானிய மொழிப் புலமையைப் பெறுவதற்கு செலவிடப்பட்ட தொகையை வெளிநாட்டு வேலைவாய்ப்புப் பணியகம் திருப்பிச் செலுத்தும் என்றும் அமைச்சர் சுட்டிக்காட்டினார்.
ஜப்பான் இலங்கைக்கு மூலோபாய ரீதியில் முக்கியத்துவம் வாய்ந்தது என சுட்டிக்காட்டிய அமைச்சர், ஜப்பானில் உள்ள இலங்கையர்களுக்கு அதிக வேலை வாய்ப்புகளை திறந்து வைப்பதற்காக PERSOL Global Workforce உடன் ஒரு பங்காளித்துவ உடன்படிக்கையில் ஈடுபடவும் ஒப்புக்கொண்டார்.